بس انت شكلِك ...

أنا: حلو
نفسي: وحش
أنا: ليه يا حاجة؟
نفسي: انت مش شايفة كل النمش والحبوب وآثار الحبوب اللي بتنفر الناس مني؟

أنا: يا بنتي ما هو في ناس كتير عندهم مشاكل في وشهم أكتر منك بس بيحبوا نفسهم. حبيني شوية بقى.

نفسي: مش عارفة!

أنا: طب هاقولك حاجة.. تقبلي حد يقول لسارة إنها وحشة؟

نفسي: ﻷ طبعًا، دي سارة دي الحتة الشمال، مبادئنا وأخلاقنا، وصداقة العُمر كله، واللي يزعلها أنهشه بإيديا وسناني!

أنا: طب بالله عليكي عامليني معاملة سارة.

نفسي: بس ماهو الناس بتقول عليا وحشه. فاكرة أما البنت كانت بتقول لصاحبها في المحل طب والله وحشة ومناخيرها كبيرة؟ فاكرة الولد اللي لما شافك من ضهرك قال لصحابه مُزة، ولما شاف وشك قالهم بس سحنتها وحشة؟

أنا: فاكراهم كلهم وفاكرة أكتر منهم كمان، بس فاكرة هـ. ع. لما قالت لك ضحكتك تجنن؟ فاكرة الراجل اللي لسة مكلمك النهاردة وقال لك نفس الكلام؟ فاكرة ماما لما قالت لك إنت حلوة؟

نفسي: فاكراهم، بس الناس دي مؤدبة بتحاول تجامل.

أنا: خلاص يبقى مفيش مبرر نسمع لقُلالات الأدب ونسيب المؤدبين، يا نصدق كله يا نكدِب كله!

نفسي: ما هم متضادين!

أنا: طب بالله عليكي، لو طوب الأرض قالك إن عودك مش حلو، أو إنك مابتعرفيش تسوقي عجل أو إنك مش مثابرة، هاتصدقيهم؟

نفسي: لو اتنططوا كده قدامي، أنا عارفة إني عود وبسوق عجل ومثابرة!

أنا: حلو، يعني مفهومك عن نفسك في التلات حاجات دول مالوش دعوة بأفكار طوب الأرض عنك، صح؟

نفسي: صح.

أنا: طب ممكن تعاملي ملامح وشي نفس المعاملة؟ يعني تاخدي فكرة حلوة عنه وماتخليش كلام الناس يأثر فيكي؟

نفسي: مش قادرة.

أنا: انت متعبة قوي!

نفسي: مانا عارفة!

أنا: طب مش ح.ع. كان بيحبك وانت وشك متبهدل حبوب واتقدم لك مرتين وانت فعلا على يقين إنه بيحبك؟

نفسي: أه، ربنا يسعده.

أنا: حلو، كل أما حد يقول لنا حاجة وحشة، افتكري إن ح.ع. كان بيحبنا إحنا الاتنين في أسوأ حالتنا الشكلية، اتفقنا؟

نفسي: اتفقنا.

أنا: ممكن حاجة كمان؟

نفسي: عارفة، هارفع راسي لفوق مهما كنت فاشلة في حياتي العاطفية، ومش هاخاف من نظرات الناس الغُرب ليا. ولو غصب عني خفت، مش هاتعثر وأنا ماشية أو أخبط في حاجة نتيجة الخوف من حكمهم عليا.

أنا: الله يفتح عليكي بكل خير.

نفسي: ربنا يسعدك ويسعدني.

أنا: آمين.

نفسي: تصبحي على خير.

أنا: وانت من أهله، وقُبلة فوق جبينك لو ينفع فيزيائيا يعني :)

Comments

Popular posts from this blog

Arabic URLs in Varnish